Pogun di Aki Maragang
Nombo pogun diti? Om iisai zi Aki Maragang? Nokuo tu aanangan zou do monusuzan kokomoi diti?
Dati do ogumu nokoongou kokomoi do Pulou Borneo. Borneo nopo nga kumotohu pulou tagazo kozo id vinoun om ii tagazo no kozo id Kabaatan-Kohisaon Asia (Wikipedia). Nabaagi o Borneo do apat ii au mogi-aga ginazo. I tagazo nopo kozo nga Kalimantan ii poinsuang Pogun Indonesia. Sabah - pungaanan haid do North Borneo - nopo nga ponong koibutan Borneo naamot do id koibutan-kotonobon nopo nga Sarawak om Brunei. Sabah om Sarawak nopo nga pogun minsoosondii ii poimpuu id Sinompuuvan Pogun Malaysia. I nopo puu suvai nga Malaya. Nakahabus no o Singapore.
Pogun Aki Maragang nopo nga o-ium id North Borneo - Sabah do baino. Pogun Sabah nimaan polintao do North Borneo Chartered Company. Na-aau om nopolinta do Jipun toluu-ai o North Borneo poguhu do nadadi do koloni do Bolitis. Iti no pogun di Aki Maragang.
Komozon nopo do "Aki" nga komohoingan kusai. Zi Maragang no ii ngaan di komohoingan kusai do Kadazan om Dusun di tahaid no kozo do noihaan. Hobi ogumu do oboos do tiinu kokomoi do ingkuo boos "Dusun" do nadadi.
Poingizon zi Maragang om tohu tanak kusai om tanak tondu tontoisoon dau id duuk do Nuhu Nabahu, nuhu di takavas no kozo doid Kabaatan-Kohisaon Asia. Noboos do tuminongkop o tanak ngaavi disido doid mogisuvai-suvai kinoizonon id North Borneo (Koibutan Borneo).
Nokuo tu monuat zou do blog kokomoi di Maragang om tana pogun di sinakagon ngaavi disido?
Ogumu otumbazaan do tanak totuo disido (Maragang) pinakaazan doid koibutan North Borneo poinghiput do Kudat. Sinakagon di tanak kusai koduvo, zi Rongguvai, tuminongkop id sokid, id kohisaon gisom do doiho id Lahad Datu. Zi Tomui, tanak kusai kotohu, pinakaazan doid Penampang, buzu no doid Papar om pakaazai no vagu doid Matunggung. I tanak tondu tontoisoon, zi Sayap, nakakaa doid Kota Belud.
Tumanud do susuzan diti, kivaa do zaa ku sabaagi sinakagon di Tomui om di Rongguvai, maza di komohoingan di ama om di ina ku. Duuduvo dii mohoing di ama ku do kotulunan di Tomui naamot do kotulunan di Rongguvai o komohoingan di ina ku.
Iti no sabap kozo nokuo tu monuat zou blog kokomoi ahal diti.
